ਮਾਏ ਨੀ ਮਾਏ
ਜਦ ਤੋਂ ਹੋਸ਼ ਸੰਭਾਲੀ ਨੀ ਮਾਏ
ਮੁੱਕ ਚੱਲੇ ਅਸੀਂ ਮਿਹਨਤ ਕਰਦੇ
ਫਿਰ ਵੀ ਰਹਿੰਦਾ ਖੀਸਾ ਖਾਲੀ ਨੀ ਮਾਏ
ਮਾਏ ਨੀ ਮਾਏ
ਸਾਡੀ ਕੀ ਹਸਤੀ ਨੀ ਮਾਏ
ਛੁਪਾ ਛੁਪਾ ਰੱਖੀਏ ਜੋਬਨ ਆਪਣਾ
ਇਹ ਬਘਿਆੜਾਂ ਦੀ ਬਸਤੀ ਨੀ ਮਾਏ
ਮਾਏ ਨੀ ਮਾਏ
ਇਹ ਕਿਸਦਾ ਦੇਸ ਨੀ ਮਾਏ
ਸੜਕਾਂ ਉਤੇ ਰੋੜੀ ਕੁੱਟਦਿਆਂ
ਰੁਲ ਗਏ ਸੁਪਨੇ ਅੱਲੜ ਵਰੇਸ ਨੀ ਮਾਏ
ਮਾਏ ਨੀ ਮਾਏ
ਕੀਹਨੂੰ ਦਿਲ ਦਾ ਹਾਲ ਸੁਣਾਵਾਂ ਨੀ ਮਾਏ
ਰੋਟੀ ਲਈ ਰੂੜੀਆਂ ਉਤੋਂ ਕਾਗਜ਼ ਚੁਗਦਾ
ਦਿਲ ਕਰਦੈ ਸਕੂਲੇ ਜਾਵਾਂ ਨੀ ਮਾਏ
ਮਾਏ ਨੀ ਮਾਏ
ਕੌਣ ਲੈ ਗਿਆ ਸਾਡੇ ਚਾਨਣ ਨੀ ਮਾਏ
ਆਪਾਂ ਭੁੱਖਾਂ ਤੇਹਾਂ ਕੱਟਦੇ
ਵਿਹਲੜ ਮੌਜਾਂ ਮਾਣਨੇ ਨੀ ਮਾਏ
ਮਾਏ ਨੀ ਮਾਏ
ਕੀ ਸਾਡੇ ਨਾਲ ਬੀਤੀ ਨੀ ਮਾਏ
ਜ਼ੋਰੀਂ ਖੋਹਕੇ ਭੌਂ ਸਾਡੇ ਕੋਲੋਂ
ਨਾਂ ਟਾਟੇ ਬਿਰਲੇ ਦੇ ਕੀਤੀ ਨੀ ਮਾਏ
ਮਾਏ ਨੀ ਮਾਏ
ਭਗਤ ਵੀਰਾ ਦੱਸੇ ਕਾਜ ਨੀ ਮਾਏ
ਲੁੱਟ ਕਿਰਤਾਂ ਦੀ ਰੋਕਣ ਲਈ
ਬਦਲੋ ਲੋਟੂ ਨਿਜ਼ਾਮ ਨੀ ਮਾਏ
ਮਾਏ ਨੀ ਮਾਏ
ਚੱਲ ਕੋਈ ਜੁਗਤ ਬਣਾਈਏ ਨੀ ਮਾਏ
ਕਿਰਤੀ ਸਾਰੇ ਕਰੀਏ ਏਕਾ
ਗਲੋਂ ਗੁਲਾਮੀ ਲਾਹੀਏ ਨੀ ਮਾਏ
ਮਾਏ ਨੀ ਮਾਏ
ਖਤਮ ਕਰੀਏ ਹਨੇਰ ਨੀ ਮਾਏ
ਸ਼ਹੀਦਾਂ ਦੇ ਸੁਪਨਿਆਂ ਵਾਲੀ
ਲਿਆਈਏ ਨਵੀਂ ਸਵੇਰ ਨੀ ਮਾਏ
ਮਾਏ ਨੀ ਮਾਏ……. . . . ਜਸਪ੍ਰੀਤ ਸਿਵੀਆਂ 25/09/2010
No comments:
Post a Comment