ਵੋਟਾਂ

ਫੇਰ ਸਮਾਂ ਆ ਗਿਆ
ਸਾਡੀ ਮਿਹਨਤ ਲੁੱਟਣ ਵਾਲੇ
ਆਉਣਗੇ ਸਾਡੇ ਦਰਾਂ ’ਤੇ
ਚਿਹਰੇ ਤੇ ਨਿਰਮਾਣਤਾ ਸਜਾ ਕੇ
ਗਲਾਂ ਵਿਚ ਪੱਲੇ ਪਾ ਕੇ
ਕਦੇ ਨੀਲੀਆਂ ਪੱਗਾਂ ਬੰਨ ਕੇ
ਕਦੇ ਚਿੱਟੀਆਂ ਟੋਪੀਆਂ ਪਾ ਕੇ
ਤੇ ਕਦੇ ਲਾਲ ਝੰਡੇ ਲੈ ਕੇ|
ਕਹਿਣਗੇ ’ਸਾਡੀ ਕਾਮਯਾਬੀ ਤੁਹਾਡੀ ਕਾਮਯਾਬੀ ਹੈ’
ਸੱਠ ਸਾਲ ਹੋ ਗਏ ਨੇ ਸਾਨੂੰ ਕਾਮਯਾਬ ਹੁੰਦਿਆਂ
ਹੱਡ ਭੰਨਵੀਂ ਮਿਹਨਤ ਨਾਲ ਵੀ ਰੋਟੀ ਨਰੀਂ ਜੁੜਦੀ,
ਜਵਾਨੀ ਗਾਲ ਕੇ ਲਈ ਡਿਗਰੀ ਦੀ ਔਕਾਤ
ਦਸ ਗ੍ਰਾਮ ਰੱਦੀ ਤੋਂ ਵੱਧ ਨਹੀਂ
ਸੱਚ ਬੋਲਣ ਜਾਂ ਜਿਉਂਦੇ ਰਹਿਣ ਵਿਚੋਂ ਇਕ ਚੁਨਣਾ ਜ਼ਰੂਰੀ,
ਇਹ ਹੈ ਸਾਡੀ ਕਾਮਯਾਬੀ|
ਇਹ ਵਾਰ ਵਾਰ ਆਉਂਦੇ ਤੇ ਜਾਂਦੇ ਨੇ
ਅਸੀਂ ਰਹਿ ਜਾਂਦੇ ਹਾਂ ਉਥੇ ਦੇ ਉਥੇ
ਲਾਰਿਆਂ ਦੀ ਅਫੀਮ ਚੱਟਦੇ
ਕਿਸਮਤ ਦੇ ਰੋਨੇ ਰੌਂਦੇ
ਕਰਮ-ਧਰਮ ਦੇ ਭਰਮਾਂ ਵਿਚ ਜਿਉਂਦੇ|
ਭਾਰਤ ਮਹਾਨ ਲੋਕਤੰਤਰ ਹੈ
ਤਾਂ ਹੀ ਤਾਂ ਸਾਨੂੰ ਹੱਕ ਹੈ, ਅਸੀਂ ਚੁਨੀਏ
ਲੂੰਬੜਾਂ, ਭੇੜੀਆਂ ਤੇ ਬਘਿਆੜਾਂ ਵਿਚੋਂ
ਕਿਸੇ ਨੂੰ ਸਾਡਾ ਮਾਸ ਨੋਚਣ ਲਈ
ਸਾਡੀ ਕਿਰਤ ਲੁੱਟਣ ਲਈ,
ਆਖਿਰ ਅਸੀਂ ਭਾਰਤ ਦੇ ਜ਼ਿੰਮੇਵਾਰ ਨਾਗਰਿਕ ਹਾਂ
ਅਸੀਂ ਕਿਹੜਾ ਦੇਸ਼ ਧ੍ਰੋਹੀ ਹਾਂ
ਜੋ ਰਾਜ ਪਲਟਾਉਣ ਦੀ ਗੱਲ ਕਰੀਏ
ਗਰੀਬਾਂ ਨੂੰ ਉਤੇ ਲਿਆਉਣ ਦੀ ਗੱਲ ਕਰੀਏ
ਅਸੀਂ ਤਾਂ ਦੇਸ਼ ਦੇ ਜ਼ਿੰਮੇਵਾਰ ਨਾਗਰਿਕ ਹਾਂ.....ਜਸਪ੍ਰੀਤ ਸਿਵੀਆਂ 22/12/2009

ਤੇਰੇ ਚਲੇ ਜਾਣ ਬਾਅਦ............

ਤੇਰੇ ਚਲੇ ਜਾਣ ਬਾਅਦ ਹੋਇਆ ਅਹਿਸਾਸ
ਕੀ ਸੀ ਅਰਥ ਮੇਰੇ ਲਈ ਤੇਰੇ ਹੋਣ ਦਾ,
ਦਿਲ ਭਰਿਆ, ਇਕੱਲਾ ਬੈਠਾ ਸੋਚ ਰਿਹਾਂ
ਹੌਂਸਲਾ ਪਏ ਨਾ ਤੇਰੇ ਤੋਂ ਬਗੈਰ ਰੋਣ ਦਾ,
ਤੇਰੇ ਨਾਲ ਗਾਹੀਆਂ ਅਣਜਾਣ ਰਾਹਵਾਂ ਬਹੁਤ
ਹੁਣ ਕੱਲਿਆਂ ਘਰੋਂ ਨਾ ਨਿੱਕਲ ਹੋਵੇ
ਡਰ ਰਹੇ ਦੁਨੀਆਂ ’ਚ ਖੋਣ ਦਾ,
ਤੇਰੇ ਨਾਲ ਹੋਇਆ ਫਾਸਲਾ, ਰੁੱਤਾਂ ਵੀ ਬਦਲੇ ਨੇ ਰੰਗ
ਜੇਠ ਹਾੜ ਵਾਂਗ ਜਾਪੇ ਮਹੀਨਾ ਸੌਣ ਦਾ,
ਤੈਨੂੰ ਕਦੇ ਕੁਝ ਦੇ ਸਕਿਆ ਨਾ
ਤਾਂ ਵੀ ਤੇਰੀਆਂ ਹੀ ਯਾਦਾਂ ਬਣੀਆਂ
ਆਸਰਾ ’ਪ੍ਰੀਤ’ ਦੇ ਜਿਊਣ ਦਾ..........ਜਸਪ੍ਰੀਤ ਸਿਵੀਆਂ 16/01/2010

ਐਨੀ ਉਦਾਸ ਸ਼ਾਮ

ਐਨੀ ਉਦਾਸ ਸ਼ਾਮ ਨਾ ਸੀ ਦੇਖੀ ਕਦੇ
ਸੂਰਜ ਦੇ ਨਾਲ ਹੀ ਡੁੱਬ ਚੱਲਿਆ ਦਿਲ ਮੇਰਾ,

ਹਰ ਰੋਜ਼ ਕਤਲ ਹੁੰਦਾ ਹਾਂ ਤੇਰੀ ਯਾਦ ਹੱਥੋਂ
ਤੈਨੂੰ ਭੁੱਲਣ ਦਾ ਤਾਂ ਵੀ ਨਾ ਦਿਲ ਕਰੇ ਜੇਰਾ,

ਤੇਰੇ ਪੱਲੇ ਨਾਲ ਛੋਹ ਕੇ ਪੌਣਾਂ ਰੁਮਕਦੀਆਂ
ਮੇਰੀ ਤਾਂ ਝੋਲੀ ਵਿਚ ਬਸ ਠੰਡਾ ਸੀਤ ਨੇਰ੍ਹਾ,

ਰਾਹਾਂ ਦੀ ਧੂੜ ਬਣ ਛੋਹਾਂ ਤੇਰੇ ਪੈਰਾਂ ਨੂੰ
ਕਾਸ਼ ਐਨਾ ਉਚਾ ਹੋ ਜਾਏ ਮੁਕਾਮ ਮੇਰਾ,

ਸੰਦਲੀ ਪੌਣਾਂ, ਮਸਤ ਘਟਾਵਾਂ ਸਾਵਣ ਦੀਆਂ
ਦਿਲ ਮੇਰੇ ਨੂੰ ਕੀ ਦੱਸਾਂ ਮੈਂ ਸਿਰਨਾਵਾਂ ਤੇਰਾ,

ਜਿਉਂ ਦਿਨ ਤੇ ਰਾਤ, ਜਿਉਂ ਫੁੱਲ ਤੇ ਖੁਸ਼ਬੂ
ਹੋ ਜਾਵੇ ਰਿਸ਼ਤਾ ਐਸਾ ਤੇਰਾ ਤੇ ਮੇਰਾ, ......ਜਸਪ੍ਰੀਤ ਸਿਵੀਆਂ 27/07/2010

ਆਪਣੇ ਕਰੀਬ ਜਾਪਦਾ........

ਉਹ ਮੈਨੂੰ ਆਪਣੇ ਏਨਾ ਕਰੀਬ ਜਾਪਦਾ
ਉਹਦੇ ਬਾਰੇ ਨਾ ਸੋਚਣਾ ਬੜਾ ਅਜੀਬ ਜਾਪਦਾ,

ਕਰ ਰਿਹਾ ਦੁਆਵਾਂ ਲੁੱਟਣ ਵਾਲੇ ਲਈ ਵੀ
ਇਹ ਤਾਂ ਕੋਈ ਸੱਚਾ ਫਕੀਰ ਜਾਪਦਾ,

ਏਸ ਮੁਖੌਟੇ ਹੇਠਾਂ ਸ਼ੈਤਾਨ ਹੈ ਲੁਕਿਆ
ਬਾਹਰੋਂ ਹਾਕਮ ਬੜਾ ਸ਼ਰੀਫ ਜਾਪਦਾ,

ਨਾ ਖੁਸ਼ੀ ਮੁਹੱਬਤ ਦੀ ਨਾ ਗਮ ਵਿਛੋੜੇ ਦਾ
ਖਾਲੀ ਦਿਲ ਸਾਡਾ ਬੜਾ ਗਰੀਬ ਜਾਪਦਾ,

ਰੋਕ ਰਿਹਾ ਪੱਥਰਾਂ ਨੂੰ ਸਿਜਦੇ ਕਰਨੇ ਤੋਂ
ਅੱਜ ਦੇ ਰੱਬ ਦਾ ਕੋਈ ਰਕੀਬ ਜਾਪਦਾ,............ਜਸਪ੍ਰੀਤ ਸਿਵੀਆਂ 13/07/2010

ਪਿਆਸ

ਤੈਨੂੰ ਮਿਲਣ ਦੀ ਪਿਆਸ ਹੀ ਮੈਨੂੰ ਪੀ ਗਈ
ਜਿਉਂ ਕੋਈ ਨਦੀ ਸੀਨੇ ਰੇਤ ਦੇ ਲਹਿ ਗਈ

ਬੜੀ ਕੋਸ਼ਿਸ਼ ਕੀਤੀ ਸਭ ਤੋਂ ਲੁਕਾਉਣ ਦੀ
ਪਰ ਚੀਸ ਇਕ ਦਰਦ ਸਾਰਾ ਕਹਿ ਗਈ

ਸਾਰੀ ਉਮਰ ਕੀਤਾ ਸਫਰ ਤੇਰੇ ਵੱਲ ਨੂੰ
ਦੂਰੀ ਫੇਰ ਵੀ ਸਾਡੇ ਵਿਚਕਾਰ ਰਹਿ ਗਈ...........ਜਸਪ੍ਰੀਤ ਸਿਵੀਆਂ 07/07/2010

ਤਲਵਾਰ ਦੀ ਧਾਰ

ਸੁੱਕੇ ਪੱਤਿਆਂ ਵਾਂਗੂੰ ਖਿੰਡ ਜਾਵਣਗੇ ਰਿਸ਼ਤੇ
ਕੀ ਮਿਲੇਗਾ ਹਵਾ ’ਚ ਸੱਚ ਖਿਲਾਰ ਕੇ,

ਹੁਣ ਤੱਕ ਹਿੱਸੇ ਆਈ ਨਫਰਤ ਅੰਤਾਂ ਦੀ
ਨਾ ਹੋਵੇ ਭਰੋਸਾ ਪਿਆਰਾਂ ਦੇ ਇਜ਼ਹਾਰ ’ਤੇ,

ਮਲਾਹ ਖੁਦ ਹੀ ਸਾਗਰਾਂ ’ਚ ਗੁੰਮ ਗਏ
ਬੇੜੀ ਨੇ ਦੋਸ਼ ਕੀ ਲਾਉਣੇ ਮੰਝਧਾਰ ’ਤੇ,

ਆਖਿਰ ਨੂੰ ਜਿੱਤ ਆਉਣੀ ਹਿੱਸੇ ਉਨ੍ਹਾਂ ਦੇ
ਮੈਦਾਨ ’ਚ ਮੁੜ ਮੁੜ ਉਠੇ ਨੇ ਜੋ ਹਾਰ ਕੇ,

ਸਿਦਕ ਸਾਡਾ ਕੀ ਪਰਖਣਗੇ ਟੁਕੜੇ ਕੱਚ ਦੇ
ਅਸਾਂ ਤੁਰਦੇ ਆਏ ਹਾਂ ਤਲਵਾਰ ਦੀ ਧਾਰ ’ਤੇ.............ਜਸਪ੍ਰੀਤ ਸਿਵੀਆਂ 29/06/2010

..............ਤੇਰੀ ਤੜਪ

ਤੇਰੀ ਤੜਪ ਨੇ ਬਦਲੀ ਕਿਸਮਤ
ਕਿੰਜ ਤੇਰੇ ਤੇ ਕੋਈ ਗਿਲਾ ਕਰਾਂ,

ਯਾਦ ਤੇਰੀ ਨੂੰ ਜਿਉਂਦੇ ਰੱਖਣ ਲਈ
ਹਰ ਪਲ ਖੁਦ ਨੂੰ ਜ਼ਿਬਾ ਕਰਾਂ,

ਅਜੇ ਤੱਕ ਮੈਂ ਜ਼ਿੰਦਾ ਲੱਗਦਾ ਹੋਰਾਂ ਨੂੰ
ਮਨ ਦੇ ਵਿਹੜੇ ਸੂਲੀ ਮੈਂ ਤਾਂ ਨਿੱਤ ਚੜ੍ਹਾਂ,

ਪਿਆਰ ਦੇ ਸੂਰਜ ਨੂੰ ਅਰਘ ਚੜਾਵਣ ਲਈ
ਹਰ ਵਾਰ ਮੈਂ ਨੈਣੀਂ ਦਿਲ ਦਾ ਖੂਨ ਭਰਾਂ

ਝੂਠੀ ਸ਼ੁਹਰਤ ਬਦਲੇ ਸੁੱਚਾ ਦਰਦ ਵੇਚਦਾਂ
ਲੱਗੇ ਮੈਨੂੰ ਜਦ ਵੀ ਹੱਥ ਕਲਮ ਫੜਾਂ,

ਹਰ ਪਲ ਆਵਣ ਇਸਨੂੰ ਖਿਆਲ ਤੇਰੇ
ਲੱਖ ਵਾਰ ਮੈਂ ਦਿਲ ਨੂੰ ਕਬਰ ਕਰਾਂ,

ਕਿਤੇ ਦੂਰ ਹੋ ਕੇ ਵੀ ਮੇਰੇ ਅੰਦਰ ਤੂੰ
ਪਤਾ ਨਾ ਲੱਗੇ ਮੇਲ ਜਾਂ ਬ੍ਰਿਹਾ ਕਹਾਂ

ਸਾਥ ਨਹੀਂ ਬਣ ਸਕਣਾ ਤਾਂ ਦੇ ਦੁਆ
ਆਖਰੀ ਸਾਹ, ਤਾ-ਉਮਰ ਮੈਂ ਇੰਜ ਰਹਾਂ